Menor de edad a nakasoan iti panagrames, nakemmeg idiay Narvacan

VIGAN CITY – Nakemmeg ti maysa a menor de edad nga agtawen ti sangapulo ket innem gapu iti panaglabsing na ti Republic Act 8353 wennu Anti- Rape Law of 1997 idiay ili ti Narvacan.

Segun ken ni Police Captain Arcadio Viloria, hepe ti Narvacan Municipal Police Station, adda grupo ti suspek ket lima da nga agkakadua ngem tallo pay laeng iti naiparuwaran ti warrant of arrest.

Kinunana, tatta laeng a nakemmeg da ti suspek agsipud ta napan idiay Tarlac ket idi laeng kalman a nagawid idiay ili ti Narvacan nga isu iti nakakemmegan na.

Ti agdama, maiyur-uray pay laeng iti desisyon ti judge nu ipalubos na nga agtalinaed iti sidong dagiti nagannak na ti suspek kabayatan a maus-usig iti kaso a nakairamanan na wennu maipan iti rehabilitation center idiay Bauang, La Union.

Ngem, para ken ni Viloria, nasaysayaat nu maipan iti rehabilitation center iti nasao a menor de edad tapnu madisiplinaan a nasayaat ken maiyadayo da kadagiti krimen a mabalin a pakainaiganda ngem para kadagiti nagannak na, kaykayat da nga agtalinaed kadakuada ti anak da.