VIGAN CITY – Pimmusay ti maysa a menor de edad gapu iti pannakaidungparna iti barikada iti kalsada a sakupen idiay Brgy. Macabiag, Sinait.
Iti pannakipapatang ti Bombo Radyo Vigan ken ni Police Chief Master Sergeant Danny Maligsay iti Sinait Municipal Police Station, mapapati a napaspas a nagturong iti bagatan a direksyon ni Cris Tumbaga, agtawen iti sangapulo ket pito, grade 10 student a taga-Brgy. Paratong, Sinait bayat iti panagmanehona iti Black Suzuki raider 150 a motorsiklo a gappuanan ti pannakaidungparna iti warning sign wenno barikada nga impan iti maysa a telecommunications company.
Segun ken ni Maligsay, saan laeng a ti barikada iti nadungpar ni Tumbaga nu diketdi naisaruno pay iti nakaparking a tricycle a gappuanan ti pannakadundunor iti nadumaduma a paset iti bagi ti biktima.
Babaen kadagiti Bureau of Fire Protection ken Philippine National Police personnel ket naipan ni Tumbaga idiay Corpuz Clinic and Hospital ngem idi maitransfer koman ket saanen a nakalasat pay.
Innayon ti PNP, mapapati a nakainom iti nasanger ti driver idi napasamak iti aksidente ken saan a nakaaramat iti helmet.
Kabayatanna, nagpalagip ni Maligsay iti publiko a saan nga agmaneho nu awanan ti lisensya ken nu addaan man ket saan a lipatan iti panagaramat ti helmet tapno awan ti maisagmak.
VC – Police Chief Master Sergeant Danny Maligsay
