VIGAN CITY – Nabigbig ti lalaki a naaksidente a pimmusay idiay Brgy. San Juan, Sta. Lucia.
Nabigbig ti biktima a ni John Thadeus Taqueban, agtawen ti sangapulo ket lima ken agnaed ti Brgy. Poblacion, Salcedo ken ti driver ti Mitsubishi Jeep a ni Marvin Gasigas Alladog agtawen ti dua pulo ket dua.
Iti pannaki-uman ti Bombo Radyo Vigan kenni Rolly Daoas, kasinsin ti biktima, nakigtot da laengen idi makita da ti social media iti ladawan ti kasinsinna a pimmusay gapo iti aksidente.
Inladawan ni Daoas ti kasinsinna a ni Taqueban a nasingpet ken naangaw a kabagyan ken no dadduma makainom ti arak ngem saan a napalalo.
Innayon ti driver a ni Marvin Gasigas Alladog a saanna a nadlaw ti motorsiklo a sumungsungad ta awan iti silaw a makina iso a nagovertake.
Dimmawat met ti pammakawan ti driver iti pamilya ni Taqueban ta saan na a pagayatan iti napasamak nga aksidente
Maipalgip a dinungpar ti nag-overtake a jeep ti biktima a ni Taqueban bayat iti panagdalyasatna iti agpaamianan a direksyon ket naipan idiay Candon City Hospital ngem naideklara a dea don arrival.
