VIGAN CITY – Rimuar iti imbestigasyon dagiti kameng ti Narvacan Municipal Police Station a naka-inom ken awan iti inaramat a helmet dagiti dua a menor de edad a nadisgracia iti National Highway idiay Brgy. Sta. Lucia idi rabii iti December 26, 2020.
Iti pannaki-uman ti Bombo Radyo ken ni PLt. Rogeline Ibe a Deputy COP iti Narvacan Municipal Police Station, agpada a nadundunor ken natamaan iti ulo da Jervin Gallezo nga agnaed iti Ambulogan, Narvacan ken nagmaneho iti motorsiklo; ken ti kinalubbonna a padana a menor de edad nga agnaed idiay Lungog, Narvacan.
Segun ken ni Ibe, pimmusay ni Gallezo gapu iti sinagabana a dunor iti ulona idinto a kritikal iti kasasaad ti kinalubbonna nga agtaltalinaed iti ospital.
Maipalagip nga agpapa-amianan a direkson dagiti dua a naglugan iti motorsiklo idi nadanonda iti agsikko a paset iti kalsada ket naawanan iti kontrol ti driver a gappuanan iti panakaidungparda iti traffic sign iti akin-kannawan a paset ti kalsada.
Kabayatanna, nagpalagip ni Ibe kadagiti amin a motorista nga agannad iti panagmaneho ken agaramat a kanayon iti helmet para iti kinatalged kasta payen a saan nga agmaneho nu nakainom iti nasanger.
