VIGAN CITY – Nakemmeg ti maysa a menor de edad nga agtawen ti sangapulo ket pito ta adda iti ikotna nga illigal a paltog idiay Brgy. Sived, Sto. Domingo, Ilocos Sur.
Maibasar ti pakaammo manipod ti Sto. Domingo Municipal Police Station, uppat a menor de edad a lallaki nga agtawen ti sangapulo ket uppat agingga sangapulo ket pito nga agnaed idiay Brgy. Lao-ingen ti nasao nga ili iti nagturong ti igid ti baybay ken nag-order ti maysa a bucket nga arak idiay Seaside Grill.
Nadlaw ti maysa a crew a ni Jester Tabillos, agtawen ti dua pulo ket dua ti maysa a Homemade Single Shot Cal. 45 a paltog a nakaikabil iti uneg ti slingbag ti suspek isu nga insigida nga impakammuna kenni Richmond Tabbilos a Jailguard ken akinkukua ti nasao a pasdek.
Innala ni Tabbilos ti paltog manipod ti suspek ket insigida a nagpaarayat iti kapitan ti barangay isunga iti agdama ket iggemen dagiti kapulisan ti suspek para iti naananay a dokumentasyon.
