Menor de edad a nagbisikleta ken lalaki a nagmotorsiklo, nadunor iti aksidente

VIGAN CITY – Dua ti nadunor iti panagdinnungpar ti bisikleta ken motorsiklo idiay barangay road ti Tamurong, Sta. Catalina.

Menor de edad ti nagbisikleta a taga-Barangay Tamorong idinto a ti nagmaneho iti motorsiklo ket ni Eddie Ramolete Rafanan, agtawen iti limapulo ket siam, taga-Barangay Sinabaan, iti nasao met laeng nga ili a daytoy ket nakainom idi mapasamak ti aksidente.

Agpapadaya ti motorsiklo idin ta nagdinnungparda ti bisikleta nga aggapu iti sabali a direksyon.

Nadunor ti nadumaduma a paset ti bagi ti nagbisikleta ken ti nagmaneho iti motorsiklo nga agpada a naipaagas iti ospital para iti pannakatamingda.