VIGAN CITY – Agtaltalinaed iti intensive care unit ken awan pay laeng iti puot ti maysa a menor de edad a mapapati a nagbekkel iti uneg ti pagkaskaseraanna idiay Ayusan Norte, Vigan City.
Segun ken ni Police Staff Sgt. Robinson Tabrilla, imbestigador ti Vigan City police station, ayaban koma dagiti kakaseraanna a mangan ti biktima ngem idi tinugtog da iti arwangan iti kwarto na ket saan a simmungbat ti biktima.
Agsipud iti dayta, sinirip ti caretaker iti tawa ket nakitadan a nakaigalut ti tennged ti biktima babaen iti barikes nga imbitinna iti tawa ken awanen ti puotna isu nga impanda idiay Metro Vigan Cooperative Hospital.
Nadakamat dagiti kakaseraanna a saan unay a makilanglangen ti biktima kadakuada ken masansan a makitada nga adda iti kasla nauneg a panpanunotenna.
