VIGAN CITY – Tumtumapawen idi nakita ti bangkay iti maysa a menor de edad iti swimming pool iti Jemar’s Resort idiay Brgy. Casilagan Sur, Banayoyo, Ilocos Sur.
Nabigbig ti nalmes a ni Fernando Aglibut Eswagen, agtawen ti sangapulo ket pito a taga Brgy. Naguimba iti nasao met laeng nga ili.
Iti pannaki-uman ti Bombo Radyo Vigan kenni PLt. Melvin Trinidad iti Banayoyo Municipal Police Station, ti biktima ket kaduana ti ikitna ken gagayyemda iti nasao a resort iti oras iti alas dos ti malem idi Domingo August 7, 2022 tapno selebraran ti panagkasangay ti adingenna a babai idi napasamak iti insidente.
Maibasar iti CCTV footage, nakatugaw iti igid ti swimming pool ti biktima idi natinnag ngem awan iti nakapansin a kakaduana ken awan iti pakakitaan a nagpaarayat isuna.
Alas kuatro iti malem iti isu met laeng nga aldaw, impagarup ti pamiliana nga immunan a nagawid ti biktima isu a nagawidda metten idi saandan a nakita iti resort ngem idi nakasangpetda ket naamuanda nga awan pay laeng isu a nag-postdan iti social media a mapukpukawen ti biktima.
Idi kalman August 9 iti oras iti alas dos iti malem ket nakita laengen ti caretaker ti resort nga adda iti tumtumpaw a bangkay ti biktima iti swimming pool.
Naamuan nga adda kissiw ti biktima nga isu iti rason iti pannakalmesna ket saan pay unay a makita iti uneg ti swimming pool ta napuraw unay gapu iti mapapati nga adu a chlorine-na.
Iti agdama, agtultuloy ti imbestigasyon dagiti otoridad inaig ti napasamak.
