VIGAN CITY – Pimmusayen ti menor de edad a karaman ti aksidente iti dua a motorsiklo idiay Brgy. Matibuey, San Emilio.
Iti pannaki-uman iti Bombo Radyo Vigan ken ni PLt. Rodel Marzan, naipan pay laeng iti ospital dagiti tallo a karaman iti aksidente ngem naiyakar ti menor de edad a nagmaneho iti nangisit a Honda RXM a ni Michael Agustin Duldulao, agtawen iti sangapulo ket uppat nga agnaed idiay Brgy, Patiacan, Quirino para koma iti pannakatamingna ngem pimmusay gapu iti sinagabana a dunor idinto a manarimaan iti panagpalaing dagiti dua a nagkalubbon iti motorsiklo a da Onofre Bandalog Maninggan, agtawen iti tallopulo ket pito, baro nga agnaed iti nasao a lugar, nagmaneho iti nalabbaga a XRM kaduana iti pasaherona a ni Rommel Lucas Reymundo.
Segun ken ni Marzan, agturong iti laud a direksyon da Maninggan idinto a ni Duldulao ket agpapadaya a direksyon ngem mapapati nga immagaw iti linya ni Duldulao a gappuanan iti panagdinnungparda.
Agpapada a nagsagaba iti dunor dagiti tallo isu a naipan dagiti dua a driver iti Candon City general Hospital idinto a ti pasahero ni Maninggan ket naipan iti San Emilio RHU para iti pannakatamingda.
Nupay kasta, naiyakar iti menor de edad iti Northside Doctors Hospital ngem pimmusay idinto a ni Maninggan ket naiyakar met iti Metro Vigan Hospital, Bantay para iti naan-anay a pannakatamingna.
