VIGAN CITY –Inallukoy ni Ilocos Sur Human Resource Chief Cora Pineda dagiti agsapsapul iti trabaho a gundawayanda ti isagut ni Governor Ryan Singson a Mega Job Fair inton Hunyo 1 idiay Provincial Capitol.
Immunan a naituding nga iti Provincial Farmers Livelihood Development Center a maangay ti mega job fair ngem nabaliwan gapu ta maigiddan ti inagurasyon ti newly-elected officers iti probinsia.
Segun ken ni Pineda, lehitimo dagiti nasurok kumurang uppat a pulo a kompania ken ahensia iti local ken abroad a makipaset iti job fair isu nga awan ti masapul a pagdanagan.
Innayonna a ti Department of Labor and Employment ti akin-akem iti screening kadagiti kompania ken ahensia a makipaset.
Para met iti One-Stop Shop ket makipaset ti Overseas Workers Welfare Administration, Technical Education and Skills Development Authority, PAG-IBIG, Philippine Overseas Employment Administration, PhilHealth, Social Security System a mangasistar kadagiti aplikante ken mangsungbat iti parikut nga idatag kadakuada dagiti miembro.
Nagpalagip ti opisial kadagiti interesado nga aplikante nga itugotda ti application letter-da. resume, OTR, diploma ken dadduma pay a credentials.
