Imbilin dagiti Judge iti International Criminal Court (ICC) ti espesyal a medical accommodation para ken ni dati a Pres. Rodrigo Duterte iti uppat nga aldaw a confirmation of charges hearing inton February 23, 24, 26, ken 27, 2026.
Iti bilin ti Pre-Trial Chamber 1, malimitaran iti uppat nga oras kada aldaw ti panagdenggeg ken maddaan ti inoras nga inana tapno makissayan ti pisikal a bannog ti dati a presidente kas maibasar iti rekomendasyon dagiti doktor iti ICC Detention Center.
Impaganetget dagiti hukom ti prinsipyo ti hustisya ken kinapatas iti tunggal biang, isu a napapaut nga oras iti nailatang iti depensa.
Ti depensa ket maikkan iti tallo nga oras ken tallopulo a minutos a presentasyon, kumparar iti dua nga oras ken tallopulo a minutos para iti prosecution, idinto a ti mangibagi kadagiti biktima ket addaan iti maysa nga oras ken tallopulo a minutos. Amin a biang ket addaan iti sag-30 a minutes opening ken closing statements.
Igiddan pay ti ICC ti tinawen a panagdenggeg iti panangkita ti detensyon ni Duterte iti maudi a session inton February 27, a pakaipasaan iti oral arguments ti prosecution, dagiti biktima ken depensa.
Ngem segun ti ICC, posible a mabaliwan ti schedule depende iti taray iti panagdenggeg ken mabalin a mangrugi nga insigida ti sumaruno a presentasyon no maleppas a nasapsapa.
