VIGAN CITY – Nakasaganan ti Caoayan Local Government Unit kadagiti pagannurotan nga ipatungpalda ita a naidalan ti Modified Enhanced Community Quarantine ti masurot manen ti curfew hour nga alas otso ti rabii agingga alas singko iti agsapa.
Iti pannaki-uman ti Bombo Radyo Vigan ken ni Mayor Germie Goulart, nakitaripnongdan kadagiti kameng ti Philippine National Police, Bureau of Fire Protection ken Rural Health Unit nga agpapada a maseknan iti pannakaipatungpal kadagiti addang kontra ti Covid19.
Maminsan laeng ti pannakaaramat dagiti pass slip a naiwaras iti tunggal pamilia ngem saan a mabalin nga aramaten dagiti senior citizen ken dagiti agtawen ti duapulo agpababa ket no maduktalan a peke ti pass slip, mabalin a makumpiskar.
Inlawlawag ti mayor a maipalubos latta dagiti tricycle driver nga agpasada tapno adda latta ti pagsapulanda ken awan ti maipatungpal a liquor ban iti nasao nga ili.
Dagiti saan nga agindeg iti Caoayan ket kasapulan nga adda maipakitada nga identification card, agpermada iti logbook ken ibagada no ania ti gagarada sakbayda a makastrek.
