VIGAN CITY – Pinasingkedan ni Baragay Captain Bong Cacho iti MDRRMC Santa Volunteer Rescue Group a dadakkel ti dalluyon idi tinurongda ti kabaybayan a paset iti ili ti Santa tapno alawen ti naipadanun kadakuada nga adda sapyawan a ginaburan ti dalluyon, isu a narigatanda a tinurong ti nasao a paset.
Iti pannaki-uman ti Bombo Radyo Vigan ken ni Cacho, idi nakasangpetda iti nasao a paset ket nadanunanda pay laeng ti maysa a tao a kumkumpet iti napattog a rakit nga isu ti immuna a naisalakanda ken natalged met ti kasasaadna.
Idi sinaludsod ti rescue team ti rinescue-da no adda pay ti kaduada a mapukpukaw ket kinunana met nga awan ngem idi nagsubli ti kabisilyada, isu dayta ti gundaway a naduktalan a maysa ti mapukpukaw.
Gapu dayta, kinatinnulag ni Capt. Cacho dagiti kakaduana nga adda iti kabaybayan nga agal-ala iti ipon tapno mangalada iti clearance wenno pammalubos ni Mayor Jesus “Popoy” Bueno.
Dagus met a nagplano ti grupo para iti alisto a pannakasapul ti mapukpukaw a tao ket nangipakatda iti bote nga adda ti danumna, a segun ken ni Cacho, dayta ti sinursurotda ken nagibasaranda no ania ti agdama a current ti danum.
Inlawlawagna pay a no ania ti water current iti rabaw ket pitopulo a porsiento nga isu met laeng ti water current iti uneg.
Nupay kasta, nasarakan ti bangkay ti biktima a ni Robert Flores a nakapakleb ken agtultulid babaen ti pannakabatok ti maysa kadagiti diver ti rescue team.
Saan pay laeng nga insigida nga imbangkag ti grupo ti biktima ta dadakkel ti dalluyon iti nangalaanda isu nga ingalutda pay laeng iti sea ambulance ta no kasta man bilang ti dagus nga aramidenda ket amangan nga isuda met ti maisagmak.
