VIGAN CITY – Nadunor ti maysa a nagmotorsiklo ken ti nadungparna nga ubing idiay Barangay Cabuloan, Sta. Catalina.
Nabigbig ti nagmaneho iti Yamaha Aerox a motorsiklo a ni Criselda Rabena Piano, agtawen iti tallopulo, negosyante, agnaed iti Barangay Sinabaan, Sta. Catalina.
Ti met nadungpar nga ubing ket agtawen iti walo, maysa a Grade 2 student, agnaed iti Barangay Cabuloan, Sta. Catalina.
Iti pannaki-uman ti Bombo Radyo Vigan ken ni Police Corporal Daryl Ramboyon, agpapadaya ti motorsiklo idin ta saan a napakpakadaan ti drayber ti ubing a nagballasiw ket nadungparna.
Gapu dayta, nagsagrap iti dunor iti ulo ken timidna ti ubing idinto a ti drayber ket nagasgasan met ti nadumaduma a paset ti bagina.
Natakuatan a saan a nakasuot iti helmet ti nagmaneho iti motorsiklo idi mapasamak ti aksidente.
Nupay kasta, agsipud ti panagkakabagyan met laeng ti pamilia ti ubing ken ti drayber ket posible a pagpatangandanto laengen ken saanen a maipila pay ti kaso.
