VIGAN CITY – Nagsagaba iti injury iti nadumaduma a paset ti bagi ti maysa nga ubing nga agtawen iti uppat gapu iti pannakadungparna iti motorsiklo a minaneho ti maysa a mannalon idiay Barangay Pallogan, Tagudin, Ilocos Sur.
Dagiti karaman iti insidente ket ti lalaki nga agtawen iti uppat nga agnaed iti nasao a barangay idinto a ti nagmaneho iti nangisit a motorsiklo ket ni Maynes Lazo Lauro, agtawen iti limapulo ket pito, naasawaan, mannalon nga agnaed idiay Brgy. Ambalayat, Tagudin.
Maibasar iti inisyal nga imbestigasyon, agpapalaud a direksyon ti motorsiklo idi nadanonna iti nasao a paset ket kellaat a nagballasiw ti ubing a gappuanan iti pannakadungparna.
Naipan iti Ilocos Sur District Hospital ti ubing para iti pannakatamingna idinto a ti driver ken ti motorsiklo ket naipan iti Tagudin Police Station tapno dumalan iti husto a proseso.
