VIGAN CITY – Maysa nga ubing ti natamaan ti stray bullet iti ili ti San Juan kagiddan ti panangsarabo ti baro a tawen.
Iti pannakipapatang ti Bombo Radyo Vigan ken ni PCol. Marlo Castillo iti Ilocos Sur Provincial Office, ti biktima nga agtawen ti siam ket adda iti ruar ti maysa a sari-sari store idi kellaat nga adda iti naiyaw-awan a bala a limsut iti isim ket natamaan ti akin-kannawan a tangan tis aka ti ubing.
Naipan iti ospital ti biktima ngem iti agdama ket natalgeden ti kasasaadna ken nakaawid payen iti pagtaenganda.
Segun ken ni Castillo, naaddaan ti agsaruno a case conference iti rumbeng a maaramid ket na-profile dagiti firearms holder iti aglawlaw iti nakapasamakan ti insidente ket adda iti dua a PNP personnel iti maimimbestigaran.
Narekubre iti maysa a buli iti lugar ngem saan pay a nabigbig nu ania ti klase ti paltog iti naaramat.
Pagyamanan ni Castillo a saan a fatal ti nasao a pasamak isu a panawaganna kadagiti umili a saan liklikanen ti agpaputok ti paltog nu sumangbay ti baro a tawen.
Kabayatanna, pinasingkedan ni Barangay Kagawad Marlon Friala a patta-pattaen dagiti pannakabagi ti linteg nga asideg laeng kadakuada ti nagpaputok iti paltog a nakatirwan iti naiwawa a bala ti tangan ti saka ti apona.
Iti pannaki-uman ti Bombo Radyo Vigan ken ni Friala, posible a naggapu iti laud ti buli a limsut iti isim ti tienda ta saanda a nangngeg ti panagputok ti paltog gapu kadagiti maigidgiddan nga uni dagiti paputok idi bisperas ti baro a tawen.
Manarimaan ti panagsaganada kadagiti insaganada a taraon para iti selebrasyonda idin ta rimuar ti ubing nga adda iti dunor ti sakana ken napidotda ti buli iti uneg ti tienda.
Gapu dayta, saandan a natutor ti selebrasyon ket dagus nga impanda ti buli iti police station idinto a ti ubing ket impaagasda iti ospital.
Nupay kasta, pagyamananna a saan a napakarwan ti apona nga ita ket natalgeden ti kasasaadna ken nakaawiden idiay Narvacan.
