VIGAN CITY – Posible a sumango ti kaso a child trafficking dagiti tallo a drug suspect a nangaramat iti maysa nga ubing a babai iti panaglakoan ti shabu iti ili ti Sta. Lucia, sabali laeng iti kaso a sangwenda a Republic Act 9165 wenno Comprehensive Dangerous Drugs Act of 2002.
Iti pannaki-uman ti Bombo Radyo Vigan ken ni PMaj. Roger Baling-oay Jr. a hepe iti Sta. Lucia Municipal Police Station, adda iti nagreport kadakuada a residente iti nasao nga ili inaig iti panangidiaya ti shabu dagiti tallo a suspek isu a naisayagkat iti buy bust operation kontra kada Ms Lady, agtawen iti uppat a pulo ket tallo, residente ti Antipolo; Mr. Y, agtawen iti duapulo ket uppat, construction worker; ken Ms. Shy, agtawen iti duapulo ket uppat, caregiver, agpada a residente ti Taytay, Rizal.
Segun ken ni Baling-oay, ti modus dagiti tallo ket ipaiggemda ti shabu iti ubing tapno saan unay a nakadkadlaw iti araramidenda nga ilegal.
Patien ni Baling-aoy a kayat dagiti suspek nga umado pay iti suplayanda iti shabu isu a saan laengen nga idiay Metro Manila iti targetda nu diketdi panggepda pay a serken iti Ilocos Sur isu a pagyamananna ta saan nga immanamong dagiti residente iti Sta. Lucia nu diketdi impakaammoda kadagiti otoridad.
Naduktalan a datin a nakemmeg dagiti tallo iti isu met laeng a kaso ta ni Ms. Lady ket nakemmeg idi 2017 ngem nakaruar iti pagbaludan idi 2022; ni Ms. Shy ket nabalud idi 2018 ngem nakaruar met laeng idi napan a tawen; ken ti lalaki ket nakemmeg idi napan a tawen ngem naka-probation laeng.
Iti agdama ket adda iti kustodiya ti Sta. Lucia Municipal Police Station dagiti tallo a suspek pakairamanan ti ubing a babai nga anak ti maysa kadagiti suspek ket mayur-uray metten dagiti kameng ti pamiliada para iti pannakasukon ti ubing.
Iti naisayangkat nga operasyon ket naala kadagiti suspek ti sangapulo ket maysa a piraso ti heat-sealed transparent a naglaon ti mapapati a shabu nga agdagsen ti sangapulo ket lima a gramo nga aggatad ti Php102,000; tallo a piraso ti one thousand peso bill kas buy-bust money; maysa a shoulder bag; maysa a maong jacket; tallo a pouch; ken Php8,820.
Kabayatanna, nagpalagip ni Baling-ay iti amin nga awan iti aniaman a napintas nga ipaay iti illegal a droga nu diketdi mangitunda laeng iti panagbabawi isu a nasaysayaat nu liklikan ti nasao nga aktibidad.
VIDEO AUDIO – PMAJ. ROGER BALING-OAY JR.
