VIGAN CITY – Saanen a makita ken makontak ni Sheryl Molina Gapate, agtawen ti tallopulo ket uppat, balasang, emplyado iti LGU-Galimuyod nga agnaed idiay Brgy. Sabangan Bato, Galimuyod gapu iti mapapati a pananglokona ken ni Madilyn Pascua Galutan, agtawen ti tallopulo ket tallo, balasang nga agnaed idiay Brgy. Patac iti nasao met laeng nga ili.
Segun ti Galimuyod Municipal Police Station, nagturong iti PNP ti biktima idi February 15 ket impakammona iti pasamak idi May 2021 nga inasitgan isuna ti suspek a nasinged a gayyemna ken sinaludsodna nu agpapautang iti kuarta ta adda ti amammona a kayatna iti umutang nga innagananna a ni Rudy Paloay, mangisursuro nga agnaed idiay Brgy. Calimugtong, Galimuyod.
Namati ken nagtalek ti biktima iti suspek isu nga immannugot ken nagpautang iti kuarta nga aggatad iti P25,000 uray saanna a nakitkita ti umutang kenkuana.
Idi October 26, 2021, immasideg manen ti suspek iti biktima ken inaramidna manen iti nasao a modus ket nangipakita pay iti surat ti agut-utang a ni Elizabeth Valdez a mangisursuro ken agnaed idiay Brgy. Bidbiday, Galimuyod ket gapu ti kinalaingna a mangallukoy ket nagpautang ti biktima iti P15,000 ta namati iti impakitana ken natalek a makabayad met laeng ti immutang ta maysa a mangisursuro.
Nupay kasta, nadanon iti Enero iti agdama a tawen, saanen a nauray ti biktima nga ited ti suspek iti bayad dagiti nagutang isu a dinanonnan ti pagtaenganda ket nakigtot dagiti nainaganan nga adda nautangda, awan iti aniaman a kasuratan a pinirmaanda ken saanda a naasideg iti suspek ken kasta payen nga awan iti aniaman a transaction-da inaig iti nasao a kuarta.
