VIGAN CITY – Agturposen iti tawenna nga uppat a pulo ket siam ni Emmanuel Andrion Odon, manipud Tinaan, Sta. Maria inton July 25 kalpasan ti tallo a dekada a panangur-urayna ta idi kallabes ket naisardeng ti panagbasana gapu ti pannakaiwawa.
Iti pannaki-uman ti Bombo Radyo Vigan ken ni Odon, maragsakan ta addan mapaneknekanna iti bagina babaen ti gundaway nga impaay kenkuana ti Ilocos Sur Polytechnic State College a makaala iti kurso a Bachelor of Science in Hotel and Restaurant Management.
Uray awan ti Latin Honors-na ket naragsak ta adda dua nga award a maawatna a pakairamanan ti Best in Discipline Writing ken Best in Tourguiding.
Ni Odon ket nagbasa pay iti makatawen idiay Saint Louis University-Baguio iti kurso nga engineering ngem nagsardeng agingga a simrek manen kadagiti dua pay a pagadalan iti nasao a siudad sakbay a napan idiay Manila nga isu met idin ti nakaigameranna iti iligal a droga.
Ngem nupay kasta, naamirisna a kayatna met ti makagiddan kadagiti de adal a kakaduana ken kayatna idin a madalusan ti naganna idiay Sta Maria ket napanunotanna ti simmuko tapno makapagbalbaliw.
