VIGAN CITY -Inkalintegan ni Belen Gabayan, maysa kadagiti suspek iti panangpeke ti delivery receipt a sinulisog la isuna ti truck driver ta namin-tallo a nagsubli kadakuada nga agpatulong nga agaramid iti S-PASS numan pay nagkedkedda idi immuna ket gapu ta kurang ti resibona ket nangala isuna iti resibo iti paglaklakwan ti kabsatna ngem saan nga isudan ti nagsurat kadagiti items nga ideliverna no di ket ti truck driver.
Inlawlawag ni PCapt. Roger Baling-oay iti Sta. Cruz Municipal Police Station no kasanoda a naduktalan dagiti dua a babai a mangpekpeke kadagiti requirements idiay Sta. Cruz border control point.
Iti pannaki-uman ti Bombo Radyo Vigan ken ni Baling-oay, dagiti antigen test result, ID ken delivery receipt ti cargo ket aprubaran ti provincial capitol ket iti panangkitkitada, nadlawda nga agpapada ti dokumento a bassit la ti nagdumaanda ket nalasinda a peke dagiti dadduma a resibo.
Gapu ti dayta, nakikammayet ti provincial government iti Ilocos Sur Police Provincial Office isu a naisaynagkat ti makalawas a surveillance ket natiliw dagiti dua a babbai iti entrapment operation.
