Pinasingkedan ni George Villanon Jr., maysa kadagiti 18 a mapapati a ‘maleta boys’ ken dati a bodyguard ni dati nga Ako Bicol Rep. Zaldy Co a naidiayaanda iti P20-P25 milion tunggal maysa tapno ibabawi ti affidavit-na a mangiramraman kada Presidente Ferdinand Marcos Jr., dati a House Speaker Martin Romualdez, ken dadduma pay nga opisial iti mapapati nga anomalya kadagiti flood control project.
Segun ken ni Villanon, adda nangidiaya kadakuada iti kuarta ngem saanna nga innaganan.
Dayta ket kalpasan nga uppat kadagiti kaduada ti nagperma iti affidavit of recantation ken mangibabawi iti immuna a testigoda.
Kabayatanna, kinontra met ti abogadoda a ni Atty. Levi Baligod nga adda napastrekda manipud iti panangisaganada iti joint affidavit.
Idi Pebrero, inyam-ammo ni Baligod dagiti 18 a lalaki kas dati a marine a mapapati a nagserbi a “bagmen” ni Co ken nangipatulod iti mapatta-patta nga P805 billion a kickback manipud kadagiti kwestionable a flood control project.
