Dati a drug surrenderee ti maysa kadagiti agkasinsin a suspek iti panagtakawan ken agpada a nadanonan dagiti pannakabagi ti linteg a madama ti pot session-da wenno ti panagaramatda iti iligal a droga idiay Barangay 1, Bantay, Ilocos Sur.
Nabigbig dagiti suspek a da Michael Evangelista Pipo, agtawen iti uppat a pulo ket innem ken ni Elmar Pipo Santos, agtawen iti tallopulo ket uppat, agpada nga agnaed iti nasao a lugar.
Iti pannaki-uman ti Bombo Radyo Vigan ken ni Police Captain Donaldson Pagalanan, drug surrenderee ni Michael Pipo idi 2016 ken nakemmeg iti buy-bust operation idi 2021 Sto. Domingo.
Masansan a taktakawen dagiti agkasinsin ti motorsiklo ken cellphone.
Nangisayangkat ti Bantay Police Station kadua ti Vigan Police Station iti follow-up operation mainaig iti carnapping incident iti pagtaengan ni Michael Pipo ngem naduktalan iti panag-pot session da iti maysa a kuarto a puon ti nakakemmeganda.
Dagiti drug evidence ket pakairamanan ti 0.05 ti mapapati a shabu nga aggatad iti P3500, naikabil iti maysa a piraso ti bassit a heat-sealed transparent plastic sachet.
Kabayatanna, dagiti non-drug evidence ket pakairamanan ti tallo a piraso ti small heat-sealed transparent plastic sachet a naglaon iti mapapati a shabu residue; uppat a strip aluminum foil a naglaon iti crystalline substance residue ti mapapati a shabu; tallo a narolyo nga aluminum foil; cellphone; dua a lighter; dua a cellphone a mapapati a natakaw idiay San Ildefonso; ken fairings ti motorsiklo a mapapati a natakaw; ken sangapulo ket innem a motorcycle fairings screw.
Iti agdama, maisagsaganan ti kaso a sangwen dagiti suspek.
