Dead on arrival iti ospital ti maysa a welder idiay Barangay Otol-patac, San Ildefonso, Ilocos Sur gapu iti pannakakuryentena itay alas kuatro trentay singko iti malem (February 2, 2025).
Ti biktima ket nabigbig a ni Ernie Lagasca Espejo, agtawen iti tallopulo, addaan ti live-in partner nga agnaed iti nasao a lugar.
Iti imbestigasyon, manarimaan ti biktima kaduana dagiti tallo a kaubraanna nga agar-aramid ti steel trusses iti maysa a rest house iti nasao a lugar idin napan ti biktima iti rooftop ket binilinna dagiti kaubraanna a bumaba tapno agsagana ti meryendada.
Bayat ti panangguyod ti biktima iti tubular steel ket aksidente a natamaanna ti live wire iti atep a gappuanan ti pannakakuryentena.
Naipan ti biktima iti Rural Health Unit-Sa Ildefonso babaen kadagiti katrabahoanna ken naiyakar iti Northside Doctors Hospital-Bantay ngem naideklarar a dead on arrival.
