VIGAN CITY – Saan a ninamnama ni War Veteran Vicente Cabacungan Cabello, agtawen iti siam a pulo ket walo nga agnaed idiay Narvacan, Ilocos Sur nga agbiag pay laeng kalpasan ti World War 2.
Iti pannaki-uman ti Bombo Radyo Vigan ken ni Cabello, gapu idi ti panangsakup dagiti Hapon iti pagilian ken pannakirangetda iti paset ti Cervantes idi ket saanna nga impagarup a makalasat ta arigna awanen idi ti lusotda.
Segun ken ni Cabello, awan ti nangpilit kenkuana a sumrek iti armada ta pangngeddengna ti makilaban para iti pagilian idi nagalada kadagiti miembro ket saan met a linapdan isuna ti nagannakna ti kayatna.
Nadumaduma nga armas iti inaramat ken naiggamanna idi nakirangetda ngem ti masansan ket ti automatic rifle ti inusarda.
Nupay kasta, apamana nalpas ti gubat sangalubongan ket nagturong isuna idiay Hawaii ket isun ti nagnaedanna agingga dimmanon ti panaglakayna ket nagsublin iti probinsia.
Pagyamanna ta agingga ita ket mabigbigbig pay laeng ti inaramidda a kinabannuar idi kallabes ta dakkel a banag kadakuada ti pannakaimbitarda ti maika-walopulo ket dua a panagrambak ti Araw ng Kagitingan idi kalman April 9, 2024.
VIDEO – WAR VETERAN VICENTE CABELLO
