VIGAN CITY – Nagballaag dagiti eksperto mainaig iti nalabes a panagkonsumo ti taraon ken inrekomendada ti healthy diets kalpasan a natay ti maysa a mukbang vlogger idiay Iligan City gapu iti stroke.
Na-stroke ti mukbang Vlogger a ni Dongz Apatan, addaan iti nasurok a 400,000 followers, idi Hunio 14 kalpasan a nangan iti fried Chicken.
Naipan pay laeng ni Apatan ti ospital, ngem pimmusay met laeng ti sumaruno nga aldaw.
Segun ti cardiologist a ni Tony Leachon, hemorrhagic stroke ti inpatay ti nasao a vlogger, a ti kayatna a sawen ket nadaraan iti utekna wenno ngimmato ti blood pressure-na ken bimtak ti urat iti utekna.
Gapu dayta, nagballag ni Leachon a ti nalabes a panagkonsumo iti taraon, nangruna ti red meat, ket mabalin a ma-stroke, isu a inrekomendana ti standard meal serving.
Nagbalakad pay ti cardiologist mainaig iti epekto dagiti mukbang vlog, a mabalin nga agtungpal ti komplikasion para kadagiti tattao a mangtulad ti nasao a content.
Kabayatanna maibasar kadagiti panagadal, ti kanayon a panagbuya iti mukbang, a nagtaud manipud kadagiti Korean terms nga “eat” ken “broadcast”, ket mabalin nga agtungpal iti eating disorder wenno internet addiction.
