VIGAN CITY – Maysa nga Isuzu Forward Truck iti naaksidente iti national highway idiay Brgy. Poblacion Sur, Lidlidda.
Segun ti Lidlidda Municipal Police Station, ti karaman iti aksidente ket ti nagmaneho a ni Dahrell Mina Ganado, agtawen iti tallopulo ket lima, naasawaan, truck driver nga agnaed idiay Brgy. Tablac, Candon ken ti pasaherona a da Edmar Supnad Elizante, agtawen iti duapulo ket siam, naasawaan, salesman nga agnaed idiay Brgy. Olo-olo, Santiago ken Nestor Garcillan Fontanilla, agtawen iti uppat a pulo ket siam, helper nga agnaed idiay Brgy. Tablac, Candon City.
Maibasar iti inisyal nga imbestigasyon, agpapadaya a direksyon ti truck ket idi nadanonna iti agsikko a paset iti highway, naawanan iti kontrol iti preno a gappuanan iti pannakaaksidentena.
Gapu iti dayta, nadundunor dagiti pasahero ti truck a gappuanan ti panagsagabada iti minor a dunor iti agduduma a paset iti bagida isu a naipanda iti Candon General Hospital Taclac, Candon City para iti pannakatamingda.
