VIGAN CITY – Mapukpukaw ti maysa a traysikel kalpasan a naiparking iti maysa a paggasolinaan idiay Barangay Magsaysay, Sinait, Ilocos Sur.
Ti akin-kukua iti traysikel ket ni Aladin Impelido Regpala, agtawen iti uppat a pulo ket dua, naasawaan, Barangay Kagawad nga agnaed idiay Barangay Teppeng, Sinait.
Iti pannaki-uman ti Bombo Radyo Vigan ken ni PMaj. Franco Catalan manipod Sinait Municipal Police Station, nagreport kadakuada ni Regpala idi ala una iti November 28, 2023 ta napukaw ti traysikelna a Honda TMX 125.
Segun kenkuana, imparking ni John Dihno Regpala a putot ni Aladan Regpala iti traysikel idi alas nuebe iti rabii ti November 27 iti sangwanan ti Little P Gasoline Station, Barangay Magsaysay, Sinait ket imbatina pay iti tulbekna ken nagturongda idiay Badoc, Ilocos Norte ket idi nagsublidan iti ala una iti parbangon idi November 28 ket napansinna nga awanen ti luganna.
Nupay adda iti CCTV footage iti nasao a lugar ket saan a naalaan ti video iti pannakaala ti nasao a lugan.
Iti agdama ket agtultuloy iti pannakasapul ti nasao a traysikel ket nakikammayetda payen iti agduduma a police station tapno masapulan iti nasao a lugan.
Gapu dayta, nagpalagip ni Catalan kadagiti umili a saan nga agtalek nga ibati lattan ti tulbek iti lugan ken nasaysayaat nu makipatang kadagiti pagiparkingan ti lugan tapno adda iti mangkita dagiti iparkingda.
VIDEO – PMAJ. FRANCO CATALAN
