VIGAN CITY – Napaltogan ti maysa a tour guide idiay Mount Tuwato, Barangay San Luis, Cervantes.
Segun ti Cervantes Municipal Police Station, ti biktima ket ni Alpie Arias Licudan, agtawen iti tallopulo ket siam nga agnaed idiay Sitio Liqueo, Barangay San Luis, Cervantes idinto a ti suspek ket ni Osmaldo Butangen Camitog alyas “OSMAL”, addan ti husto a tawen, laborer nga agnaed idiay Sitio Pautan, Barangay Malaya, Cervantes.
Nakaawat ti report dagiti otoridad inaig iti nasao a pammaltog idiay Mt. Tuwato, Barangay San Luis, Cervantes ket naamoan manipod ken ni Jomar Padsing a residente iti Barangay Malaya, Cervantes a ti grupo ti biktima ket agturong iti Mt. Tuwato para iti panagulida kaduada iti maysa pay a grupo iti mountain hikers.
Apaman a nadanonda iti nasao a lugar, napansin ti biktima ti uram ken asok iti lugar isu a napanna kinita ket apagbiit laeng, nanggeg iti putok ti paltog isu a nagngiwat ket imbagana iti pannakapaltogna babaen ti suspek.
Natamaan ti barukong ti biktima isu a naipan iti Ilocos Sur District Hospital – Bessang Pass, Cervantes para iti pannakatamingna.
Kabayatanna, naisayangkat iti dragnet operation para iti posible a pannakakemmeg ti suspek.
