VIGAN CITY – Maisagsaganan ti kaso a sangwen dagiti uppat a suspek a mapapati a nagtakaw iti store ni Lorna Unciano, agtawen iti uppat a pulo ket tallo a taga-Brgy Camanggaan, San Juan.
Nabigbig dagiti suspek a da John Elmer Sarmiento, agtawen iti sangapulo ket walo; Rannel Sarmiento, agtawen iti duapulo nga agpada a taga-Brgy Camanggaan; Mike Angelo Raquepo, agtawen iti sangapulo ket walo a taga-Brgy. Immayos Norte, San Juan ken ti maysa a menor de edad.
Iti inisyal nga imbestigasyon, alas dyes iti rabii ti November 1 idi nadlaw ti biktima a nawara dagiti lakona nga insigida nga impakaammona iti San Juan Police Station.
Nakastrek dagiti suspek babaen ti panangulida iti front gate ken panangpwersada a pananglukat iti steel window ti store.
Ala una y media iti met laeng isu nga aldaw, nag-inventory ti biktima ket naduktalanna a mapukpukaw ti pito a ream ti sigarilyo nga aggatad iti PHP16,100.
