VIGAN CITY – Maysa a senior citizen iti natakawan iti tallo a kalding idiay Brgy. Rugsuanan, Vigan City, Ilocos Sur.
Segun ti Vigan City Police Station, nabigbig ti biktima a ni Servillano Duran Figuerres, agtawen iti innem a pulo ket lima, naasawaan, awanan ti trabaho nga agnaed iti nasao a lugar.
Maibasar iti inisyal nga imbestigasyon, pinasingkedan ni Figuerres nga imbatina dagiti kaldingna iti talon ti kaanakanna a ni Dr. Bennedict Kristine Figuerres idi malem iti April 7, 2022 ngem idi agsublin iti bigat ti April 8 tapno pakanen dagiti tarakenna ket naamuanna a mapukpukaw dagiti kaldingna.
Gapu iti dayta ket sinapulna dagiti tarakenna agingga immasideg kenkuana ni Melchor Reboldera ket impakaammona nga adda nakitana a tallo a kalding iti maysa a talon idiay Brgy. Paing, Bantay a kas iti mapukpukaw a taraken ti biktima.
Insigida a nagkiddaw iti tulong ti biktima iti Vigan City Police Station isu a nagresponde dagiti pulis ket nakitada dagiti taraken a kalding ti biktima ken ni Marlo Javir Astrande ket naamuan a ginatangna laeng dagiti kalding iti tallo a lallaki idi April 8 iti alas tres iti malem.
Kabayatanna, dagiti nasao a lallaki a nagilako kadagiti kalding ket nabigbig a da Leymarc Farinas Casinova, agtawen iti duapulo ket pito, baro, awanan ti trabaho; Jun Casinova Lucero, agtawen iti duapulo ket uppat, baro, construction worker; ken ni Benhur Torrado, agtawen iti duapulo, baro, awanan ti trabaho nga agpapada nga agnaed idiay Sitio Fontanilla, Paing, Bantay.
