VIGAN CITY – Nasarakan nga awanen ti biagna a tumtumpaw iti bubon ni Alicia Gaviola Fernandez, agtawen ti innem a pulo ket maysa, awanan trabaho nga agnaed idiay Brgy. San Vicente, Magsingal, Ilocos Sur.
Nakaawat ti Magsingal Municipal Police Station ti pakaammo manipod ken ni Barangay Captain Benjamin Garcia Maranon iti nasao a barangay inaig iti pannakalmes ti nasao a senior citizen isu a nagtignayda ket nakitada ti bangkay iti biktima iti uneg iti nauneg a bubon, mano a metro manipod iti pagtaenganna.
Nupay naipan iti Ilocos Sur District Hospital-Magsingal ti biktima ket naideklarar a dead on arrival babaen ti attending physician-na.
Iti imbestigasyon a naisayangkat, naudin a nakita ti biktima iti pagtaenganna idi rabii ti August 16 ngem idi sapulenen ti kabsatna a ni Albert Gaviola Fernandez iti simmaruno nga aldaw ket saanna a masarakan, agingga nakitana ti tsinelas ti biktima iti asideg iti bubon ket idi tinang-awanna ket isun ti pannakakitana ti biktima.
Mapapati nga agsagsagaba iti parikot ti salun-at ti biktima a posible a rason ti nanggibusanna iti biagna.
