VIGAN CITY – Nakemmeg ti maysa a senior citizen a Top 8 Most Wanted Person iti Municipal Level idiay Brgy. Casilagan, Sta. Cruz.
Segun ti Sta. Cruz Municipal Police Station, nabigbig ti akusado a ni Dominica Belmonte Kern, agtawen iti innem a pulo ket tallo, naasawaan, pensioner manipod Vienna, Austria ngem agnanaed iti nasao a lugar.
Ti panagtitinnulong dagiti pannakabagi ti linteg ket nakemmegda ti akusado babaen iti bileg iti warrant of arrest nga inruar iti RTC Branch 71 Candon City a napetsaan idi December 20, 2021 gapu iti kasona a panaglabsing iti RA 10175 wenno Cybercrime Prevention Act of 2012 a narekomendaran iti pyansa nga aggatad iti P48,000.
Kabayatanna, nakakustodiyan iti Sta. Cruz Police Station ti akusado ket maisagsaganan iti pannakaiturn-overna iti korte.
