VIGAN CITY – Nadunor ti tumeng ti maysa a senior citizen a nagmotorsiklo gapu iti pannakatukbobna iti sarsarunwenna a traysikel iti national highway idiay Barangay Immayos Norte, San Juan, Ilocos Sur.
Iti pannaki-uman ti Bombo Radyo Vigan ken ni PSSg. Dheu Alibin nga investigator on case iti San Juan Municipal Police Station, ti nagmaneho iti Kawasaki Baja tricycle ket ni Efren Agbayani Villanueva, agtawen iti uppat a pulo, naasawaan, laborer nga agnaed idiay Barangay Salapasap, Cabugao idinto a ti nagmaneo iti Blue Honda XRM a motorsiklo ket ni Dionicio Ramirez Virtudez, agtawen iti innem a pulo, naasawaan nga agnaed idiay Barangay Calautit, Sto. Domingo.
Segun kenkuana, agpada nga agpapaamianan a direksyon dagiti dua iti agsalog a paset iti nasao a kalsada idin ti traysikel nga akin-sango ket nakadena ken naipan iti paset iti pilid a gappuanan iti insigida a panagsardengna isu a natukbob ti nakamotorsiklo.
Gapu dayta, nadunor ti tumeng ti nagmotorsiklo isu a naipan iti Ilocos Sur District Hospital – Magsingal ket innem a dait iti naisayangkat kenkuana idinto a ti driver iti traysikol ket saan a naan-ano.
Kabayatanna, nagpalagip ni Alibin kadagiti amin a motorista iti kanayon a panagsurot iti regulasyon iti kalsada, nangruna iti panagaramat ti helmet, panangsurot ti husto a speed limit, panagannad ken disiplina iti bagi.
VIDEO NI PSSG DHEU ALIBIN
