VIGAN CITY – Dead on arrival ti maysa a senior citizen a nagmaneho iti motorsiklo ta nasagid iti nagmaneho iti PUV iti national highway idiay Brgy. Sabuanan, Sta. Lucia.
Segun ti Sta. Lucia Municipal Police Station, ti nagmaneho iti motorsiklo ket ni Freddie Bautista Portela, agtawen iti innem a pulo ket maysa, naasawaan, mannalon nga agnaed idiay Sitio Guimod, Brgy. Rubio, Galimuyod idinto a ti nagmaneho iti PUV ket ni Pedro Pablo Orteza, agtawen iti uppat a pulo ket walo, naasawaan nga agnaed idiay Brgy. Bungol, Balaoan, La Union.
Agpada nga agturong iti bagatan a direksyon dagiti dua a lugan a ti akin-sango ket ti nakamotorsiklo a ni Portela idin nag-over take ti driver ti PUV ket nasagidna iti nakamotor a gappuanan ti pannakadunor ti ulo ti driver ken pannakadunor iti nadumaduma a paset ti bagina.
Naipan ni Portela iti Candon City Hospital babaen kadagiti nagresponde nga LDRRMO-Sta. Lucia ngem naideklarar a dead on arrival babaen ti attending physician-na.
Kabayatanna, nakakustodiyan kadagiti pannakabagi ti linteg ti driver iti PUV para iti proper disposition.
