VIGAN CITY – Natay ti maysa a senior citizen a lalaki gapu iti pannakaaksidentena bayat a nakamotorsiklo iti municipal road idiay Sitio Kinapian, Suyo Proper, Suyo, Ilocos Sur.
Iti pannaki-uman ti Bombo Radyo Vigan ken ni Police Executive Master Sergeant Marinel Leonen manipod Suyo Municipal Police Station, ti biktima a nagmaneho iti Blue Rusi 150 a motorsiklo ket ni Andres Enrique Saguden, agtawen iti innem a pulo, naasawaan, mannalon, awanan ti drivers license ken saan a naghelmet nga agnaed idiay Sitio Kinapian, Suyo Proper, Suyo.
Segun ken ni Leonen, bayat nga agsang-at iti nagmotorsiklo iti nasao a kalsada ket mapapati a naawanan ti kontrol ti manibela isu a naidungpar iti kayo a gmelina isu a napaidda ken naitupa iti ulona a rason ti nakadunoranna.
Naipan isuna iti Rural Health Unit iti Suyo ngem naideklarar a natay babaen ti Municipal Health Officer a ni Dra. Mary Concepcion Sibucao.
Naamoan dagiti otoridad nga agmenmentenance para iti hypertension ti biktima isu a patien ti asawana a nakaliway iti panagagasna a rason iti posible a pannaka-ulawna bayat ti panagmanehona.
VIDEO – POLICE EXECUTIVE MASTER SERGEANT MARINEL LEONEN
