Nakemmeg ti maysa a lalaki, agtawen iti innem a pulo ket dua, naasawaan nga agnaed idiay Sitio Paring, Brgy. Baballasioan, Sta. Maria, Ilocos Sur gapu iti kasona a frustrated murder.
Iti pannaki-uman ti Bombo Radyo Vigan ken ni PMaj. Macario Dulawan Jr. manipod Sta. Maria Municipal Police Station, ti pannakaiserbi ti warrant of arrest ti suspek ket napetsaan idi January 27, 2025 ken narekomendaran iti pyansa nga aggatad ti P40,000 babaen ti Presiding Judge, Regional Trial Court, First Judicial, Branch 72, Narvacan nga inyimplementar dagiti kameng ti Sta. Maria Police Station.
Segun ken ni Dulawan, bayat a magmana iti nasao a lugar ti suspek a naggapu iti taltalon ket naranaan dagiti kameng ti pannakabagi ti linteg isu a nakemmeg.
Tawen 1985 pay laeng idi nabagsol ti suspek nga agtawen idi iti duapulo ket dua ti katrabahoanna ngem ita laeng a naimplementar iti warrant of arrest-na.
Kabayatanna, impasigurado ni Dulawan nga uray nabayagen a pasamak ket agtultuloy iti panangimplementarda iti warrant of arrest dagiti addaan ti kaso tapno maiserbi iti hustisya.
VIDEO – PMAJ. MACARIO DULAWAN JR.
