VIGAN CITY – Nadunor ti maysa a security guard a binagkong ti kaubraanna met laeng a gwardya idiay Quezon Avenue, Brgy 3, Vigan City, Ilocos Sur.
Nabigbig ti suspek a ni Allan Jay Princena Guillermo, agtawen ti tallopulo ket tallo, security guard, taga- Brgy Puerta Real, Sto Domingo idinto a ti biktima ket ni Eduardo Damasco, agtawen iti tallopulo ket siam, security guard a taga-Brgy. Rugsuanan, Vigan.
Agin-innangaw dagiti dua idin ta nagkinnaritda nga agbogsing ket idi agawiddan, insardeng ti suspek ti motorsiklona a dagus a bimmaba ken immasideg iti biktima.
Inagaw ti suspek ti helmet ti biktima ken dinanogna ti ulona sa inruarna ti keychain knife-na a pinangbagkongna iti biktima.
Naipan iti Ilocos Sur Provincial Hospital Gabriela Silang, Tamag, Vigan City ti biktima para ti pannakatamingna idinto nga iggemen dagiti otoridad ti suspek ken narekobre iti crime scene ti kutsilyo nga adda kaatiddogna a 5 ½ inches pakairamanan ti appotanna.
