VIGAN CITY – Panaglabsing iti Provincial EO 95 Series of 2021 iti naipila a kaso kontra ti maysa a retired PNP a nakemmeg idiay Brgy. Lungog, Narvacan.
Iti pannaki-uman iti Bombo Radyo Vigan ken ni PCapt. Arcadio Viloria, hepe iti Narvacan Municipal Police Station, agkurang iti dokumento nga impakita ni Allen Wilfred Benedito, agtawen ti limapulo, naasawaan nga agnaed idiay Brgy. Patucannay, Tayum Abra iti panagserrekna iti probinsia nga ita ket nakaisalinong ti General Community Quarantine with heightened restrictions.
Segun ken ni Viloria, bisitaen ni Benedito ti anakna a nayospital iti Gabriela Silang General Hospital ngem gapu ta saan a kumpleto iti dokumentona ket pinagsublida iti probinsiana ngem kiniddawna nga agU-turn ngem nagderetso iti siudad ti Vigan isu a nakemmeg iti Quarantine Check Point.
Iti agdama, addan ti kustodiya iti Narvacan Police Station ti suspek tapno dumalan ti husto a proseso.
