VIGAN CITY – Nagpanawagan ni Jadelhyn Calixterio, registered midwife ken paramedics nga agnanaed iti Ilocos Sur iti pannakasapul dagiti nagannakna gapu iti pannakapukawna idi pay laeng nagbaetan iti tawen 1997 agingga 1998 iday Pangasinan.
Iti pannaki-uman iti Bombo Radyo Vigan ken ni Calixterio, dakkel a saludsud kenkuana iti kinataona isu nga aramidenna amin tapno maamuan nu siasino iti nagannakna.
Segun ken ni Calixterio, insalaysay ti imbilangna nga ina nga idi nagibaiheda dagiti prutas idiay Pangasinan idi 1997 ket nakitada isuna nga agmaymaysa ken nakakaasi iti langana isu a pinakanda ket idi awan iti nangala ket inyawidda ditoy Ilocos Sur ta kalikagumna met idin nga aywanan ta awananda ket ngarud iti anak iti asawana.
Gapu ta inayat isunan ti imbilangna nga ina, saanna nga insigida nga impakammo maipapan kenkuana isu nga idi laengen January 31, 1998 iti pannakaideklararna nga anaknan ket iti nasao a petsa ket isun iti nagbalin a kasangayna.
Namin-uppat a darasen a nagturong idiay Pangasinan ta namnamaenna a masapulanna dagiti nagannakna ket umabot ti walo a PNP station iti napananna nagpatulongan ngem adda laeng ti tallo nga station iti nang-entertain kenkuana.
Nupay kasta saan a napukawan iti namnama ta agingga ita, sapsapulenna pay laeng dagiti nagannakna babaen iti panagpost-na iti social media ta nakapokus pay laeng iti panagadalna iti medisina ket nagyaman pay ta babaen ti Bombo Radyo Vigan ket adadun iti nakanggeg iti pakaistoryaanna.
Kiddawna ngarud kadagiti tattao nga addaan ti lead a contact-n da laeng isuna tapno makitana met laengen ti nagannakna.
