VIGAN CITY – Maysa a lalaki iti nakemmeg iti naiwayat a search warrant gapu iti panaglabsingna iti Republic Act 10591 idiay Barangay Ansad, San Esteban.
Iti pannaki-uman iti Bombo Radyo Vigan ken ni PLt. Arnold Calzado iti San Esteban Police Station, nabigbig ti nakemmeg a ni Antonio Eleccion Castro Fabro, agtawen ti limapulo, baro, mannalon nga agnaed iti nasao a barangay.
Naalaan ti suspek iti maysa a unit iti cal. 38 a revolver nga adda lima a live ammunition iti cylinder-na, pito a piraso iti cal. 45 live ammunition, dua a rifle grenade nga adda casing ken pink pouch-na.
Segun ken ni Calzado, ti suspek ket maysa a person of interest ti pannakatay ni Jonalyn Ecraela, agtawen ti uppat a pulo, taga-Bigbiga Santiago a nasarakan iti bangkayna idi February 1, 2020 iti kamaisan idiay Barangay Suso, Sta. Maria a naburbor ti rupana ken nakaibaba pay iti sapinna
Malaksid iti dayta, adu iti naidanon kadakuada a report ti pannakainaigna iti iligal nga aktibidad ken kanayon a panagikotna iti paltog no rumuar.
Kabayatanna, kiddawna kadagiti agindeg iti ili ti San Esteban nga ipakammoda laeng kadakuada no adda iti ammoda nga agik-ikot iti saan a rehistrado a paltog tapno matignayanda.
