VIGAN CITY – Agpada a nadunor ti nagmaneho iti nagmotorsiklo ken maysa a pedestrian iti aksidente a napasamak iti national higway idiay Brgy. Panay Norte, Magsingal.
Segun ti Magsingal Municipal Police Station, ti nagmaneho iti nangisit a Yamaha Mio ket ni Lea Urolaza Sapon, agtawen ti duapulo ket walo, product promoter nga agnaed idiay Pagsanaan, Magsingal idinto a saan a nabigbig ti lalaki a mapapati nga adda parikot ti panagpampanunotna a magmagna iti nasao a highway.
Nakaawat dagiti pannakabagi ti linteg iti report inaig iti aksidente iti nasao a lugar ket pinasingkedan ni Pacifico Racca Tabil, agtawen ti uppat a pulo ket lima, naasawaan, driver nga agnaed idiay Brgy. Baclig, Cabugao a ti lalaki a saan pay a nabigbig ket magmagna iti tingnga iti national highway idin aksidente a nadungpar ti nagmotorsiklo a ni Sapon gappuanan ti pannakadundunorda.
Naipan iti Magsingal District Hospital ni Sapon ken ti lalaki para iti pannakatamingda idinto a saan pay nga ammo nu mano ti gatad ti nadadael a paset iti lugan.
