VIGAN CITY – Nasurok kumurang PHP248,685 ti natakaw manipud iti 178 Shopping Center idiay Barangay Sta. Monica, Magsingal.
Ti biktima ket ni Pearl Crystal Pablo Cortez, agtawen iti duapulo ket lima, manager ti nasao a pagtagilakuan, ken agnaed iti Barangay Camestizoan, Sto. Domingo idinto a dagiti suspek ket saan pay a nabigbig.
Nakaawat ti Magsigal Police Station iti tawag nga adda napasamak a panagtakawan iti nasao a pagtagilakuan a dagus met a tinurong dagiti pannakabagi ti linteg.
Natakuatan a simrek dagiti suspek iti tuktok ti isim ti establisimiento babaen ti panangputedda iti galvanized iron roof.
Basar iti CCTV footage, nakasuot dagiti dua a suspek iti short ken dark shirts, ket idi addada iti uneg ti establisimiento, inusarda ti badoda a mangabbung iti langada.
Dinadaelda ti lock ti aruangan ti opisina sada inukag ti vault ket intarayda ti kuarta.
Iti pannaki-uman ti Bombo Radyo Vigan ken ni Police Captain Rodel Ragasa, agtultuloy ti panangkitkitada kadagiti CCTV ken naaladan ti rupa dagiti suspek a simrek iti uneg ket namnamaenda a mabigbigto met laeng.
