VIGAN CITY – Dead on arrival ni Samuel Alcantara, agtawen iti duapulo ket maysa a taga-Orence, Narvacan gapu ti panagdinnungpar ti naglugananna nga elf truck iti maysa a trailer truck idiay San Nicolas, San Esteban.
Nabigbig ti nagmaneho iti elf truck a ni Gavino Alcantara, agtawen iti uppat a pulo ket walo a taga-Orence, Narvacan ken dagiti pasaherona a ni Robert Cabebe, agtawen iti uppat a pulo ket uppat a taga-Limmansangan, Narvacan ken ti biktima idinto a ti nagmaneho iti trailer truck ket ni Charles Suniga, agtawen iti limapulo ket innem a taga-Meycauayan, Bulacan.
Iti pannaki-uman ti Bombo Radyo Vigan ken ni PLt. Arnold Calzado, agpapa-amianan ti trailer truck idin ta bimtak ti pilidna a rason ti saan a pannakakontrol ti drayber iti manibela ti lugan ket naidungpar iti nasabetna nga elf truck.
Gapu ti dayta, dua kadagiti pasahero ti nadunor a naipaagas iti Candon City General Hospital ngem maysa kadakuada ti pimmusay idinto a saan a naan-ano ti drayber ti trailer truck.
