VIGAN CITY – Saan a ninamnama ni Francis Pilien, agindeg iti Purok 1, Capangpangan, Vigan City ti nakaro a pannakalayusda iti baet ti panagduprak ti bagyo Egay.
Iti pannaki-uman ti Bombo Radyo Vigan ken ni Pilien, na-trauma-dan iti napasamak agsipud ta agiyem-empakeda ti alikamenda idin ta napaspas ti danum a simrek iti pagtaenganda.
Gapu dayta, dinadaelda ti bubeda ti balayda ta isu ti inusarda a pagnaan ken paglinongan nga agkakabbalay kagiddan ti panagiyur-urayda ti mangrescue kadakuada.
Alas singko iti malem idi aglinlinongdan iti tuktok ti balayda babaen iti bubeda a dinadaelda ngem nakasangpet laeng dagiti nag-rescue a kameng ti Philippine Navy iti alas tres y media iti parbangon.
Malaksid dayta, saanda a dagus a nakabakwit agsipud ta saanda a ninamnama a nakaro ti mapasaranda a layus.
