VIGAN CITY – Pinasingkedan ti menor de edad nga anak ti natay a driver iti traysikel a mapanda koma sunduen ti kakabsatna idi nakadinnungparda iti motorsiklo idiay Taleb, Bantay.
Napasamak itattay alas tres kwarenta iti bigat iti insidente a nakairamanan iti motorsiklo a minaneho ni Julius Cesar y Marinas, agtawen ti duapulo ket lima, baro nga agnaed idiay Paing, Bantay ken ti traysikel a minaneho ni Stanley Andres, agtawen ti uppat a pulo kaduana ti asawa na a ni Phoebe Andrez, agtawen ti uppat a pulo ket maysa ken putotna nga agtawen ti sangapulo ket maysa nga agpapada nga agnaed iti Parudos, Burgos.
Iti pannaki-uman ti Bombo Radyo Vigan ti agtawen ti sangapulo ket maysa a lalaki a karaman iti insidente, pinasingkedanna a mapanda sundoen ti kakabsatna idiay Zone 6, Bantay nga adda iti pagtaengan iti ikitna tapno agkakaduana a mangsarabo iti baro a tawen idi napasamak iti insidente.
Segun ti menor de edad, siririing isuna idi napasamak iti insidente idi nakitana laengen iti sumungad a napaspas a motorsiklo a nangdungpar kadakuada a gappuanan iti pannakatay ti amana ken nakadunoran ti inana kasta payen isuna.
Inbingay ti menor de edad nga insigidana a tinurong ti inana ket sinarsarapana ta naipit iti sakana.
VC- MENOR DE EDAD
Kabayatanna, ti ina ti menor de edad ket nakapuoten nga agpapalaing iti ospital idinto a ti driver iti motorsiko ket nagsagaba met laeng iti dunor iti nadumaduma a paset iti bagina.
