Nasurok-kumurang P1.3 million ti gatad ti nauram a paset ti maysa a pagtaengan idiay Barangay Pantay Fatima, Vigan City.
Ti pagtaengan ket kukua ni Remijo Aninag Rapisura, agtawen iti pitopulo ket innem.
Iti pannaki-uman ti Bombo Radyo Vigan ken ni Darios Orpilla manipod Bureau of Fire Protection – Vigan City, nakaawatda ti tawag manipod maysa a concerned citizen idi July 29 iti alas dies singkwentay singko iti rabii maipanggep ti pannakauram ti maysa a bungalow a pagtaengan isu nga insigida iti panagresponde dagiti otoridad.
Segun ken ni Orpilla, partially burned ti pagtaengan ta saan met a naaramid ti light materials nu diketdi kongreto ti pannakaaramidna ngem adu dagiti nauram nga alikamen iti uneg.
Awan met ti naapektaran a sabali a pagtaengan ta insigida a nasebseb ti apoy ken agi-innadayo dagiti balay.
Kabayatanna, saan pay nga ammo nu ania iti nagtaudan ti uram ta agtultuloy iti imbestigasyon mainaig ti nasao a pasamak.
