VIGAN CITY – Maysa a pagtaengan idiay Brgy. Panay Norte, Magsingal iti mapapati a natakawan idi kalman.
Segun ti Magsingal Municipal Police Station, dagiti biktima ket da Ireneo Hidalgo Santella Jr., agtawen iti innem a pulo ket tallo, naasawaan, retired airport police; ken ni Theresita Arellano Santella, agtawen iti innem a pulo ket maysa, naasawaan, house wife nga agpada a taga-No. 41 Tacloban St. Pael State Culiate, Quezon City ngem agdama nga agnanaed idiay Panay Norte, Magsingal.
Nakaawat dagiti pannakabagi ti linteg iti mapapati a panagtakawan iti nasao a lugar ket naamoan a nakariing ni Ireneo ken napan iti CR ngem idi nagsubli iti kuartoda ket napansinna a mapukpukaw iti uppat a cellphone-da a ti dua ket IPHONE XI, maysa nga oppo ken maysa a Samsung; ti trolley bag nga addaan iti lupot ken shoulder bag a naglaon kadagiti wallet nga adda linaonna a siam a ribo a pisos, 800 US Dollar, ID cards, ATM cards, credit card, passport-da ken alahas nga aggatad iti 300,000 pesos.
Nagsapulda iti uneg ti pagtaenganda ngem naamoanda a ti mapukpukaw a trolley bag ken sling bag-da ket addan iti asideg iti pagbasuraan ti pagtaenganda.
Gapu ti pasamak, agtultuloy iti imbestigasyon dagiti pannakabagi ti linteg iti nasao a mapapati a panagtakawan.
