VIGAN CITY – Sapsapulen ita dagiti pannakabagi ti linteg iti Burgos Police Station dagiti nagkalubbon iti motorsiklo a nangipaturong iti paltog iti maysa a biktima a nakalugan iti pick-up idiay Barangay Lucaban, Burgos.
Iti pannaki-uman ti Bombo Radyo Vigan ken ni P/Lt. Donaldson Pagalanan, agmanmaneho ti biktima iti pick-up nga agawid koman iti nakaikamanganna idiay Nagbukel idin ta nakitana dagiti suspek iti igid ti kalsada nga adda iti abay ti motorsiklo.
Sinardengan ti biktima dagiti suspek ta dinamagna no naggapuanda ket simmungbat ti maysa kadakuada a naggapuda idiay Abra ken naplatan ti luganda.
Nupay kasta, pinanawan ida ti biktima ket intuloyna ti nagmaneho idin ta dagiti suspek ket sinurot ken nag-overtake sa pinaturongan ti backride iti paltog ti biktima sakbay a nagturongda iti amianan a direksyon.
Kabayatanna, iti pannakipatpatangda iti biktima ket awan met ti maibagana a mabalin a motibo ngem nupay kasta ket agtultuloy ti imbestigasyon dagiti otoridad.
