VIGAN CITY – Nauram ti maysa a motorsiklo bayat ti panagdalyasatna iti national highway idiay Barangay Gongogong, San Ildefonso, Ilocos Sur.
Iti pannakipapatang ti Bombo Radyo Vigan ken ni Senior Fire Officer III Richard Garcia, Fire Marshal iti ili ti San Ildefonso, ti akin-kukua iti motorsiklo a Yamaha mio sporty 115 ket ni Allan Guillermo, agtawen iti tallopulo ket dua, nga agnaed idiay Barangay Puerta Real, Sto. Domingo.
Segun kenkuana, bayat a nakamotorsiklo ni Guillermo kaduna iti live in partner na ket nakariknada iti pudot iti paset ti sakada isu nga insardengda iti igid iti higway ket isun ti pannakakitada a maur-uraman ti motorsiklo.
Iti imbestigasyon a naisayangkat, naamoan nga adda iti naipan a plastic iti cylinder head iti motorsiklo a gappuanan ti pannakauramna.
Kinunana pay nga arigna awan iti nabatin iti motorsiklo gapu iti pannakauramna kangrunaan iti paset ti compartment.
Kabayatanna, ti nasao a motorsiklo ket ginatang ni Guillermo iti gatad a P40,000.
VIDEO OF SENIOR FIRE OFFICER III RICHARD GARCIA
