VIGAN CITY – Nasarakan ti maysa a motorized bangka iti kabaybayan a paset idiay Brgy. Alangan, Magsingal.
Segun ti Magsingal Municipal Police Station, nakitada Erwin Pagay Relon, agtawen ti uppat a pulo ket dua, naasawaan; Efren Pagay Relon, agtawen ti uppat a pulo ket pito, naasawaan ken Anthony Relon Tab nga agpapada a mangngalap ken agindeg iti nasao a lugar iti maysa a light blue motorized bangka nga adda markana nga “AGNO 2022, RJ and RJL” iti agsumbangir a pasetna.
Ti nasao a bangka nga awan ti operatorna ket nakita iti kaadayo a sangapulo ket uppat a kilometro manipod iti municipal water.
Insanglad dagiti mangngalap ti nasao a bangka ket impakaammoda iti nasao a banag kadagiti otoridad isu nga iti agdama ket temporaryo a nakakustodiya iti bangka kadagiti Brgy. Official idiay Brgy. Alangan, Magsingal.
